De Bürschtbert isch euse ganzi Stolz. Mir hend en mit viel liebi ufgrüschtet und hoffed dass mir no ganz viel meh dra mache chönd. Nöd nur demit mir, sondern au alli mit dene mir en teiled, en wunderschöne Campingufenthalt chönd gnüssä. Mir hend würkli lang gsuecht bis mir en Wohnwage mit dere Ruumufteilig gfunde hend und mir sind de Meinig, dass es kei besseri git. Siitlich im Heck isch es Doppelbett wo sich miteme Vorhang vom rescht vom Wohnwage abtrenne laht. I de Front hemmer en Sitzegge wo sich mitem absenkbare Tisch zumne zuesätzliche Schlafplatz umfunktioniere laht, isch aber eher für chlineri Persone geignet. d'Chuchi isch zentral und grümig. Eso chunt mer sich gegesiitig nie id queri. Au wenn gad öpper am choche isch, chunt mer problemlos anenand verbi zum in Sitzegge, uf Toilette oder is Bett zgah. Er het vo eus e Solaralag mit 330W ufs Dach spendiert becho und zwei Batterie mit insgesamt 180Ah (2'160Wh). Mit dere Alag isch er komplett autark und Strom isch immer reichlich vorhandä. (Sofern mer de Bürschtbert nöd in Schatte stellt) USB-A 2x2.5A Steckdose zum Lade vo Mobilgrät verbaut. Eini ide Chuchi und eini bim Bett. 110 Liter Frischwassertank im Heck verbaut.