WikiLeaks maak nóg onthullings openbaar
2010-12-01 08:30
Den Haag - Nog onthullings is Dinsdag deur die webwerf WikiLeaks uit vertroulike en geheime Amerikaanse diplomatieke korrespondensie openbaar gemaak.
Die Chinese regering was ontsteld oor ’n verslag van die Amerikaanse ambassadeur in Seoel nadat hy met die Suid-Koreaanse adjunkminister van buitelandse sake gesels het.
Die adjunkminister het vertel van twee hoë Chinese amptenare wat aan hom gesê het hul regering is besonder gefrustreerd met die Noord-Koreaanse diktatuur en dat dié land se leier, Kim Jong-il, soos ’n “bedorwe kind” optree.
Erger nog, die twee Chinese het te kenne gegee dat hulle ten gunste is van die hereniging van die twee Koreas onder Suid-Koreaanse leiding indien Noord-Korea in duie sou stort. Die voorwaarde sou wees dat die nuwe staat ’n vriend van China moet wees.
’n Ander Chinese amptenaar het Noord-Korea se kernwapenprogram ’n “bedreiging vir wêreldvrede” genoem, iets wat China nog nooit wou erken nie.
Verdere onthullings sluit in:
Prins Andrew van Brittanje het die Amerikaanse ambassadeur in Kirgistan tydens ’n ete met sakelui geskok met sy “onbeskoftheid”.
Hy het onder meer onbeskofte opmerkings gemaak oor joernaliste van The Guardian, Britse korrupsie-ondersoekers, Frankryk en Amerikaners. ’n Senior amptenaar in die Statebond se sekretariaat het te kenne gegee dat prins Charles nie geskik is om sy ma, koningin Elizabeth II, as hoof van dié organisasie op te volg nie.
Hy “dwing nie dieselfde respek af nie”, het die amptenaar glo gesê.
Die Amerikaanse minister van buitelandse sake, me. Hillary Clinton, het pres. Cristina Kirchner van Argentinië se geestesgesondheid bevraagteken.
Sy het diplomate gevra om vas te stel of Kirchner medikasie gebruik om kalm te bly, want dié is glo ’n “veranderlike en emosionele” leier wat “senuagtig en beangs” is.
Clinton het Maandagaand in ’n lang verklaring gesê Amerika is “diep jammer” die sowat 250000 diplomatieke dokumente, almal blykbaar van die departement van buitelandse sake, het rugbaar geword.
“Die bekendmaking is nie net ’n aanval op Amerika se buitelandse belange nie. Dit is ’n aanval op die internasionale gemeenskap,” het sy volgens AFP gesê.
“Ons gaan aggressief optree om diegene wat vir die diefstal van hierdie inligting verantwoordelik was voor stok te kry.”
Die dokumente – die meeste is tussen 2007 en Februarie vanjaar geskryf – is in die geheim aan WikiLeaks gegee, wat dit aan mediagroepe beskikbaar gestel het.
Volgens die stigter van WikiLeaks, Julian Assange, dek die dokumente “elke groot saak” waarby Amerika betrokke is.
Hy het Maandag in ’n onderhoud met die saketydskrif Forbes gewaarsku dat die volgende groot “storting van inligting” vroeg volgende jaar gaan wees en die geheime van ’n “groot Amerikaanse bank” sal uitlap.
Volg Nuus24 op Twitter.
- Die Burger